Nëntë vjet negociata dhe disa marrëveshje të brishta për atë se si të ndahet uji i lumit më të gjatë në botë pothuajse shkuan dëmë javën e kaluar për shkak të reshjeve të mëdha të shiut.
Pamjet satelitore të bëra javën e kaluar nga një kompani amerikane treguan se uji tashmë është duke u mbledhur në pendën kontraverse që Etiopia e ka ndërtuar në Nilin e Kaltër, duke i shtyrë zyrtarët egjiptianë që të kërkojnë sqarim urgjent, ndërsa zyrtarët sudanezë janë ankuar se niveli i ujit në lumë ka rënë.
Duket se shiu i madh tashmë e ka mbushur rezervuarin e pendës dhe Etiopia ka thënë se do ta mbushë atë me apo pa marrëveshje me dy vendet e tjera. Egjipti dhe Sudani janë të shqetësuar se kjo do të ndikojë në pakësimin e ujit në segmentet e lumit që kalojnë nëpër territorin e tyre.
Rundi i fundit i bisedimeve mes këtyre shteteve ka dështuar dhe marrëveshja ende nuk është arritur, shkruan “CNN”, transmeton Gazeta Express.
Diga e ndërtuar nga Etiopia është projekt hidroenergjetik që ka kushtuar 4.5 miliardë dollarë dhe është shumë i rëndësishëm për qëllimin e këtij shteti që të bëhet fuqi energjetike në Afrikë.
Megjithatë, për Egjiptin ky projekt paraqet kërcënim për njërin nga burimet më të çmueshme. Shumica e 102 milionë banorëve të këtij shteti jeton në ultërisën e Nilit dhe varet shumë nga uji i këtij lumi, duke filluar nga nevoja për pije, nevojat në industri dhe ujitje të tokave bujqësore.
