Partia Demokratike e Kosovës ka nxjerrë disa rekomandime për të përmirësuar situatën e përgjithshme lidhur me menaxhimin e pandemisë. Gazeta Express sjell dokumentin dhe rekomandimet e PDK’së.
Shefi i grupit parlamentar të Partisë Demokratike të Kosovës, Bedri Hamza ka dorëzuar te kryetarja e Kuvendit, Vjosa Osmani sot gjatë ditës disa rekomandime që kanë për qëllim përmirësimin e situatës së përgjithshme për menaxhimin e pandemisë.
Në këto rekomandime që i ka siguruar Express, PDK rekomandon që të autorizohet Komisioni për Shëndetësi që në afatin më të shpejtë kohor të sjellë për miratim në Kuvend ligjin Anti Covid.
Gjithashtu, nga PDK’ja kërkojnë që të rriten pagat e profesionistëve shëndetësore.
“Kërkojmë urgjentisht qe Qeveria e Kosovës me vendim te veçantë te rrisë pagat e profesionisteve shëndetësore, ashtu siç ishte planifikuar me Projektligjin e Pagave, duke përfshirë edhe rritjen sipas kërkesave te infermiereve. Po ashtu, ky vendim duhet te përfshije te gjithë zyrtaret shtetërorë qe po përballen çdo dite me menaxhimin e pandemisë COVID-19”, thuhet në kërkesë.
Partia që udhëhiqet nga Kadri Veseli rekomandon gjithashtu që të punësohen edhe 1500 punëtorë shëndetësorë.
Gjithashtu, në këtë dokument shihet se PDK’ja ka kërkuar edhe licencimin e sektorit privat për të bërë teste për COVID 19, si dhe që të sigurohet IKSHPK’ja së bashku me organet e rendit që të prekurit me koronavirus të mos i shkelin kriteret e izolimit.
Megjithatë, këto rekomandime në formë të rezolutës nuk janë miratuar për shkak se në seancën e sotme ka pasur mungesë të kuorumit, pasi që vetëm 40 deputetë ishin të pranishëm në sallë./GazetaExpress/
