Lautaro Martinez e pranon se goli i tij i shënuar në fitoren me rezultat 3:1 të Interit kundër Torinos kishte rëndësi të veçantë për të, pasi që nuk kishte shënuar gol që një kohë.
Sulmuesi argjentinas e shënoi golin e 13-të në 29 ndeshjet e tij të zhvilluara në Serie A këtë sezon, ndërsa të 18-tin në të gjitha garat,
E përkundër që ky rekord është mjaft i mirë në krahasim me lojtarët e tjerë të Interit dhe me sezonet e kaluara të Lautaros, argjentinasi nuk kishte shënuar në gjashtë ndeshjet e fundit të zhvilluara për Interin.
“Me të vërtetë e doja këtë gol, pasi që nuk kisha shënuar që një kohë”, e pranoi Martinez në intervistën e dhënë pas ndeshjes.
“Ne jemi të lumtur me këtë fitore. Ky gol është veçanërisht i rëndësishëm për mua dhe jam shumë i lumtur që skuadra e dëshmoi se çfarë mund të bëjë”.
“I kishim humbur shumë pikë gjatë ndeshjeve të fundit, përkundër që kemi luajtur mirë. Kjo ishte një ndeshje e mrekullueshme kundër një kundërshtari të vështirë”.
Torino kishte kaluar në epërsi në ndeshjen e së hënës në San Siro përmes golit të shënuar nga Andrea Belotti, mirëpo Ashley Young, Diego Godin dhe Lautaro Martinez e përmbysën rezultatin në pjesën e dytë të ndeshjes.
Kjo fitore e ngre Interin në pozitën e dytë në tabelën e Serisë A, me 68 pikë, baras me Lazios në vendin e tretë.
