Trajneri i Liverpoolit, Jurgen Klopp, e ka bërë të qartë mendimin e tij se dënimi i Manchester Cityt nga UEFA nuk duhej të ishte shfuqizuar nga Gjykata e Arbitrazhit Sportiv (CAS), pasi që ka thënë se e hëna s’ishte ditë e mirë për futbollin.
Manchester City do të luajë në Ligën e Kampionëve sezonin e ardhshëm, pasi Gjykata e Arbitrazhit Sportiv (CAS) e ka shfuqizuar dënimin me dy vjet pezullim nga futbolli evropian për klubin anglez, transmeton Gazeta Express.
UEFA e dënoi Man Cityn me dy vjet pezullim nga garat evropiane në shkurt të këtij viti, për shkelje të rënda të rregullave për ndershmëri financiare (FFP) dhe licencim të klubit. Klubi i Premierligës i pati mohuar akuzat në mënyrë ta vazhdueshme dhe të ashpër dhe muajin e kaluar vendosi të ankohej ndaj dënimit në CAS.
Pas një seance dëgjimore që zgjati tri ditë në muajin qershor, CAS-i ka vendosur tani që t’ia heqë dënimin të kaltërve. Kjo nënkupton se City do të jetë i lirë të marrë pjesë në Ligën e Kampionëve sezonin e ardhshëm, ndërsa, dënimi me gjobë prej 30 milionë euro i është ulur në 10 milionë euro.
E gjitha kjo e ka lënë të pakënaqur Kloppin, i cili ka thënë se rregullat e FFP-së duhet të ishin respektuar në mënyrë që të mbrohen klubet dhe garat duke mos e lejuar askënd të shpenzojë jashtëzakonisht shumë para.
“Nuk e di nëse duhet ta jap mendimin tim. Është një temë serioze. Nga pikëpamja personale, jam i lumtur që City do të luajë në Ligë të Kampionëve, ata s’do t’i kenë 10-12 ndehsje më pak tani në Premierligës, pasi që ashtu s’do ta kishte askush më lehtë ta fitojë titullin”, ka thënë Klopp.
“FFP-ja është një ide e mirë, por nuk jam unë për ta gjukuar. Unë thjesht mendoj se duhet t’i respektojmë rregullat e FFP-së. Me të vërtetë shpresoj se ato s’do të tërhiqen, pasi që kështu ua japin disa kufij klubeve”.
“Nuk mendoj se e djeshmja ishte një ditë e mirë për futbollin. FFP-ja është një ide e mirë. Është aty për t’i mbrojtur ekipet dhe garat, në mënyrë që asnjë klub të mos e teprojë me shpenzime dhe që paratë që shpenzohen të bazohen në burime të duhura”.
“Nëse klubet më të pasura dhe vendet më të pasura mund të bëjnë çfarëdo që të duan, atëherë kjo e vështirëson situatën. Kjo do të çonte drejt një lige botërore, gjithçka do të varej nga ai që e ka pronësinë e klubit, e jo nga klubi”.
Në një komunikatë për media pas vendimit, CAS duke e arsyetuar vendimin tha: “Shumica e akuzave për shkelje të raportuara nga dhoma gjykuese e Institucionit për Kontroll Financiar të Klubeve (CFCB) i UEFA-s ishin të pabazuara apo me limit të skaduar kohor”.
“Nuk ishte i drejtë shqiptimi i një dënimi për ndalim pjesëmarrjeje në garat për klube të UEFA për Manchester City vetëm sepse dështoi të bashkëpunojë në hetimet e CFCB-së”, thuhet tutje në njoftim.
