Deputetja e PDK’së, Ganimete Musliu e ka quajtur skandaloze vizitën e eurodeputetes Viola Von Cramon në Gjykatën Speciale.
Musliu përmes facebook-ut ka thënë se vizita e raportueses për Kosovën në PE Von Cramon tregon se Prokurori i Specializuar nuk merret me drejtësi por me plotësimin e ambicieve personale.
“Skandaloze dhe juridikisht e paprecedent kjo vizita e eurodeputetes Viola Von Cramon në Gjykatën Speciale, e cila është edhe raportuese për Kosovën në Parlamentin Evropian.Kur sheh kësi veprimesh skandaloze të një eurodeputeteje, nuk është aspak për t’u çuditur që sot e kemi një Zyre të Prokurorit të Specializuar në Hagë, e cila në vend se të merret me drejtësi, merret me plotësimin e ambicieve personale të një eurodeputeteje, që qartazi anon politikisht në Kosovë”, ka shkruar Musliu.
Deputetja e PDK’së ka kërkuar që eurodeputetja të bëjë të qartë se cilat ishin interesat e saj për të vizituar Gjykatën Speciale.
“Është në interes të transparencës dhe vlerave demokratike evropiane, që ajo ta bëjë të qartë se cilat ishin interesat e saj në Gjykatën Speciale, kur asnjë nga deputetët e Kuvendit të Kosovës që e kanë miratuar ligjin dhe i kanë mandatuar gjyqtarët dhe prokurorët e specializuar në Hagë, nuk i kanë vizituar asnjëherë për t’ia ruajtur autonominë e funksionimit të tyre si institucion, përderisa në anën tjetër kemi ndërhyrje flagrante të një eurodeputeteje”, ka shkruar ajo.
