Trajneri i Llapit, Tahir Batatina, beson se Ballkani e meritoi titullin e kampionit më shumë sesa Drita, megjithatë tha se edhe gjilanasit e morën titullin e kampionit me meritë.
Ballkani u ndal me barazim 2:2 nga Gjilani të mërkurën në Stadiumin e Qytetit, në atë që ishte një ndeshje jetike për secilën skuadër për shpresat e tyre për titull, transmeton Gazeta Express.
Pavarësisht se e përmbysi rezultatin brenda tre minutave falë Mirlind Dakut dhe Jetmir Topallit, Ballkani nuk ia doli të mbahej dhe pranoi gol në minutën e 94-të, duke ia dorëzuar titullin Dritës.
Skuadra nga Suhareka ishte befasia e këndshme e këtij sezoni në Superligë me arritjet dhe lojën e saj. Ballkani luftoi për titull deri në javën e parafundit dhe ka mundësi ta mbyllë vitin me një trofe të paktën, pasi është në finale të Kupës së Kosovës, ku e pret Prishtina.
Megjithatë, barazimi i së mërkurës bëri që Drita të shpallet kampionia e re e Kosovës. Trajneri i Llapit, Tahir Batatina, vlerëson se Ballkani e ka merituar më shumë sesa Drita titullin në këtë kampionat.
“Edhe Drita edhe Ballkani e kanë merituar titullin, por mendoj që Ballkani e ka merituar më shumë”, ka thënë Tahir Batatina në një prononcim për “Zeri.info”.
Një xhiro para fundit të kampionatit, Llapi ndodhet në pozitën e pestë me 44 pikë të mbledhura. Në ndeshjen e fundit takohet me Vushtrrinë në udhëtim.
